БИШКЕК, 28-апр. — Sputnik. Россиянын ар бир аймагы коронавирус кооптуулугунда ар бир адамдын өмүрү үчүн күрөшүүгө 100 пайыз даяр турушу керек. Бул тууралуу Россия президенти Владимир Путин регион жетекчилери менен коронавируска каршы күрөшүү боюнча кеңешме өткөрүп жатып билдирди.
"Эске сала кетейин, аймактарга 28-апрелде эле кошумча 95 миң атайын койкаларды коюу боюнча тапшырма берилген. Алардын коронавирус инфекциясына чалдыккандарды дарылоого зарыл каражаттар менен жабдылышы айтылган. Бул боюнча күн сайын маалымат алып жатам. Тапшырма мөөнөтүндө аткарылып, ал тургай айтылгандан көбүрөөк, 116 миң койка даярдалгандыгын кабарлашты. Бирок бул өлкө боюнча жалпы картина. Башкы нерсе, эң маанилүүсү — Россиянын ар бир аймагы коронавирус кооптуулугунда ар бир адамдын өмүрү үчүн күрөшүүгө 100 пайыз даяр турушу керек. Бир жагы жакшы, бир жагы начарыраак болбошу керек" — деди Путин.
Россиянын 82 аймагында өткөн сутка боюнча коронавирус табылгандардын саны 5849 адам болду. Алардын ичинен 60 киши каза тапты. Өткөн суткада 677 бейтап айыгып чыкты.
Ал эми жалпы сан боюнча айтсак, РФте илдетке кабылгандардын саны 93 558ге жетип, анын 8 456сы сакайып кетти. 867 киши көз жумду.
