БИШКЕК, 26-апр. — Sputnik. Жалал-Абад облусунун Ала-Бука районунун дарыгерлери коронавирус менен ооруган келинди айыктырып, үйүнө чыгарышты. Бул туурасында Саламаттык сактоо министрлигинен билдиришти.
Маалыматка караганда, дарыланган келиндин беш айлык боюнда бар болгон.
“Коронавирус жуктуруп алганым мен үчүн аябай күтүүсүз болду. Бирок оору симптому жок өттү, дене табым көтөрүлгөн жок. Биринчи күндөрү курсактагы балам үчүн сарсанаа болуп жаткам. Бирок медиктер коркунуч жок экенин айтып тынчтандырып, карап жатышты. Эки жолу вируска каршы препараттарды ичтим. Дарыгерлердин колдоосуна жана камкордугуна ыраазычылык билдирем!” — деген айыккан келин.
Ошондой эле алардын үй-бүлөсү үчүнчү баласын күтүп жатканы маалым болду. Кош бойлуу келин Ала-Букада коронавируска кабылган алгачкы бейтаптардын бири эле.
Жаш келин ооруканада 14 күн жаткан, эми дагы үй карантининде болмокчу.
Коронавирустун кесепети
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
