БИШКЕК, 13-апр. – Sputnik. Мунай саткан өлкөлөрдүн ОПЕК+ уюму 2020-жылдын май-июнь айларында нефть өндүрүүнү суткасына 9,7 миллион баррелге кыскартуу боюнча чечим кабыл алганы маалым. Өлкөлөр ортосундагы келишимдин дагы башка жагдайларын РИА Новости жазды.
Мындан сырткары, ОПЕК+ мамлекеттери 2021-жылдын декабрь айында жаңы келишимди узартуу мүмкүнчүлүгүн карашы ыктымалдыгы дагы айтылды.
Буга чейин Россиянын энергетика министри Александр Новак келишимдин алкагында май жана июнь айларында мунайды кыскартуу боюнча сүйлөшүлгөн 9,7 миллиондун 2,5 миллион баррели РФке туура келерин билдирген.
Жаңы келишим тууралуу
ОПЕК+ уюмунун жаңы келишимин кабыл алуу Мексиканын айынан төрт күнгө созулуп кетти. Себеби аталган мамлекетке мунай өндүрүүнү суткасына 400 миң баррелге кыскартуу сунушталган. Бирок өлкө буга макул болбой, 100 миң баррелге гана азайта аларын билдирген. Узакка созулган сүйлөшүүлөрдүн натыйжасында АКШ Мексиканын ордуна калган 300 миң баррелди кыскартууну убадалады.
Россия менен АКШнын лидерлери өзүнчө дагы сүйлөшүп нефть рыногундагы кырдаал боюнча пикир алмашты.
Белгилей кетсек, буга чейин бир катар адистер мунай өндүрүүнүн көлөмүн азайтууга коронавирус пандемиясы себеп болгонун айтып чыгышкан. Алардын пикиринде, илдет бүт дүйнөгө тарап карантин киргизилгендиктен мунай колдонуунун көлөмү рекорддук көрсөткүчкө азайган. Мындан улам ОПЕК+ өлкөлөрү мунай сактаган жайларда орун калбай калышын алдын алуу максатында ушундай чечимге келишти.
