БИШКЕК, 10-апр. — Sputnik. Өлкө башчы Сооронбай Жээнбеков бүгүн, 10-апрелде, Түрк тилдүү мамлекеттердин кызматташтык кеңешинин (ТМКК) видеоконференция форматындагы кезексиз жыйынына катышат. Бул туурасында президенттин маалымат кызматы билдирди.
Маалыматка ылайык, Азербайжан республикасынын төрагалыгы астында өтө турган жыйында коронавирус инфекциясынын жайылышы жана анын кесепеттери менен күрөшүүдө түрк тилдүү өлкөлөрдүн күч-аракеттерин бириктирүү маселеси талкууланат.
Видеоконференция форматындагы жыйынга Азербайжан президенти Ильхам Алиев, Казакстандын өлкө башчысы Касым-Жомарт Токаев, Түркиянын лидери Режеп Тайип Эрдоган, Өзбекстандын башчысы Шавкат Мирзиёев, Түркмөнстандын президенти Гурбангулы Бердымухаммедов катышат. Ошондой эле Венгриянын премьер-министри Виктор Орбан жана ТМККнын башкы катчысы Багдад Амреев да жыйында болот.
Мындан тышкары, Дүйнөлүк саламаттык сактоо уюмунун (ДСУ) башкы директору Тедрос Аданом Гебрейесустун катышары күтүлүп жатканы айтылды.
