Батыралиев: врачтардын ишинен саясат жасабай ынтымакта иш алпарсак
Советтер Союзу учурунда эртең согуш чыгып кетчүдөй дарыгерлер бардык нерсеге окутулуп, даяр турчу. Тилекке каршы, кыскарып отуруп бул үйрөтүүлөр кийинчерээк такыр эле жок болуп кеткен. Бул тууралуу Талантбек Батыралиев Sputnik Кыргызстан радиосуна маек куруп жатып билдирди.
Анын айтымында, учурда өлкөдө айрым саясатчылар дарыгерлердин абалын өзүнүн саясий кызыкчылыгы үчүн пайдалануу аракеттерин көрүүдө.
"СССР убагында эртең согуш болуп кетчүдөй окутуулар болуп турчу. Дарыгерлер бардык нерсеге даяр эле. Бирок соңку 30 жылда оптимизация деп баарын кыскартып отуруп, жада калса Жугуштуу оорулар департаменти да жоюлуп кеткен. Мунун натыйжасында элдин эле эмес, дарыгерлердин да жугуштуу оорулардан өзүн-өзү туура коргоо боюнча билими жетишсиз деңгээлге келип такалганбыз. 2015-жылы кызамык калк арасына жайылганда мен бул кызматты кайрадан калыбына келтирип, азыркы министр жетекчи болуп дайындалган. Бирок азыр өткөндү айтып, бири-бирибизди сындап эмес, калктын ден соолугун ойлоп биримдикте иш алып баруу зарыл. Жатып алып телефондон башкарган жетекчилерге айтып кетет элем. Күнү-түнү иштегиле, керек болсо жардам берели, айткыла. Мамлекеттик органдарга тоскоол болбой штабга жардамдашалы. Саясий партиялар, айрым саясатчылар да бул абалды өз кызыкчылыгына пайдаланып, элди дүрбөтпөсө. Пандемиядан ынтымак менен гана чыга алабыз", — деди Батыралиев.
Профессор абал турукташкан соң оор кырдаалдан сабак алып, кыргыз медицинасын толугу менен мобилизациялоо маселеси курч турганын кошумчалады.
