БИШКЕК, 20-мар. – Sputnik. Республикалык штаб коронавирустун жайылып кетпешин алдын алуу максатында ресторан, кафе жана оюн-зоок борборлорунда чогулган адамдарды көргөндөр болсо байланышка чыгууну суранды.
Буга чейин өлкөдөгү ресторандарда үй-бүлөлүк, жамааттык мааракелерди өткөрүүгө тыюу салынган. Өкмөт башчы Мухаммедкалый Абылгазиев жергиликтүү бийликтин өкүлдөрүнө жана ички иштер органдарына бул тыюуну тыкыр көзөмөлгө алуу керектигин айткан.
"Эгер сиз коомдук жайлардан 50дөн ашык адамдын чогулганын көрүп калсаңыз, ошол жайлардын аталыштарын жана даректерин сүрөт, видео түрүндө ИИМдин (0701) 02-70-25 WhatsApp номерине жөнөтүңүз же (0312) 66-36-18 байланыш номерине кайрылыңыз", – деп жазылат маалыматта.
Эгер эрежеге баш ийбегендер болсо, алар Кылмыш-жаза кодексинин 280-беренесине ылайык, атайылап же этиятсыздыктан санитардык-эпидемиологиялык эрежелерди бузган, байкабастыктан массалык ооруларга, адамдарды уулантууга же болбосо ири зыян келтирүүгө алып келген делип VI категориядагы айып салынат. Мындан сырткары, белгилүү бир кызматты ээлөө же эки жылга чейин белгилүү бир ишмердүүлүк менен алектенүү укугунан ажыратылышы мүмкүн.
Кылмыш-жаза кодексинин 68-беренесине ылайык VI категориядагы айыптын көлөмү жашы жете электер үчүн – 120 миңден 140 миңге чейин, жеке жактар үчүн 260 миңден 300 миңге чейин жетет.
