Косметолог: аял менен эркектин бетине эки башка кам көрөбүз
Аял менен эркектин бет терисине кам көрүү бири-биринен айырмаланып турушу керек. Бул тууралуу Жанара Кубаныч Sputnik Кыргызстан радиосунун эфиринде маек куруп жатып билдирди.
Анын айтымында, муздак абадан ысыкка өтүп жаткан март, апрель айларында күндүн нуру ачуу тийип, пигменттик тактар пайда болуу коркунучу жогору.
"Аял менен эркектин бет териси бири-биринен айырмаланат. Косметолог-дарыгерлер аларга эки башка кам көрүшөт. Анан сөзсүз түрдө аларга арналган косметика дагы экиге бөлүнөт. Себеби мырзалардын бетинин териси катуу, калың болот. Бирок ошентсе да аял-эркек болобу, ар бир адамдын организми ар түрдүү, бири-бирине окшошпойт. Ошондуктан адис ар бир адамдын терисине жараша дарылоо ыкмасын аныктайт. Андан тышкары, тукум кубалоочу сепкил менен кайрылган кардарлар болот. Ал эми кош бойлуу кезинде же ички органдарында маселе жаралып бетине так түшсө, ал адамды алгач дарыгерге кайрылууга жиберебиз. Андан кийин гана териге кам көрүлөт. Жогоруда белгилеп өткөндөй, ар бир адамдын организми бири-бирине окшошпогондуктан, эгер бир адамдын бетиндеги так аппарат менен жасалган процедурада кетсе, башкасында андай жыйынтык болбой калышы мүмкүн", — деди косметолог.
Дарыгер бетти күн сайын кечкисин таза жууп, беттеги кемчиликтерге жараша кремди колдонуп, күндүз күндөн коргоочу крем коюп жүрүү керектигин кошумчалады.
