БИШКЕК, 10-фев. — Sputnik. Кыргызстан Мусулмандарынын муфтийи Максатбек ажы Токтомушев Чүй облусунун Ысык-Ата районундагы Ивановка айылынын борбордук мечитинде жергиликтүү тургундар менен жолукту. Бул туурасында муфтияттын маалымат кызматынан кабарлашты.
Эл менен жолугушууга Ысык-Ата районунун баш имам хатиби Бактыбек ажы Убабеков, Ысык-Ата районунун акими Байыш Курманов баштаган жергиликтүү бийликтин өкүлдөрү катышкан.
"Жолугушуунун негизги максаты жакында Казакстандын Кордай аймагынан убактылуу Чүйгө келген элдин ал-абалы менен Азирети Муфтий жакындан таанышып, аларды сабырдуулукка, улут аралык ынтымакка жана биримдикке чакыруу болгон", — деп айтылат маалыматта.
Токтомушев Кең-Булуң айылында жайгашкан гуманитардык жардам уюштурулган жайга барган. Ал жерде убактылуу күн кечирип жаткан кордайлыктардын ал-абалы менен таанышкан.
Кийин муфтий "Кең-Булуң" көзөмөл өткөрүү бекетине барып, ал жактагы абалга көз салып турган аскер кызматкерлери менен пикир алышкан.
Окуянын чоо-жайы
7-февралда Казакстандын Жамбыл облусундагы Масанчи айылында жергиликтүү тургундар ортосунда массалык мушташ болгон. Жергиликтүү укук коргоо кызматкерлери ал окуяга тиешеси бар адамдарды аныктоо иштерин жүргүзгөн.
Ошол эле күнү Жамбыл облусунун Сортөбе айылында эки жаран автоунаасы менен полициядан качып барып өз үйүнүн алдынан колго түшкөн. Алар погончондорго баш ийбей, окуя болгон жерге алардын жакындары чогулуп, тартип сакчыларына кол көтөрүп, кызматтык автоунаасына таш ыргыткан.
Ал күндөрү Кордай тараптан Кыргызстанга чек арадан балдар, аялдар, улгайгандар өтүп, алардын бир нечеси Токмоктогу ооруканага жаткырылган.
9-февралда Казакстандын вице-министри келип Токмокто жаткан бейтаптарды алып кеткен.
Кордайдагы окуя тартип коргоо органдарынын көзөмөлүнө алынып, окуянын кесепетин жоюу жана анын кантип чыкканын аныктоо максатында Казакстандын өкмөт башчысынын орун басары Бердибек Сапарбаев башында турган өкмөттүк комиссия түзүлгөн.
Кийинчерээк Казакстандын Ички иштер министрлигинен Кордай районунун Масанчи айылындагы башаламандык кандай башталгандыгын айтып беришкен.
Касым-Жомарт Токаев 10-февралда Кордайдын акимин иштен алууну тапшырды.
