БИШКЕК, 2-фев. — Sputnik. Акыркы жылдардын ичинде Кыргызстандын айыл чарба сектору өнүгө алган жок жана айыл чарбасынын ИДПнын жалпы көлөмүндөгү үлүшү кыскарып кетти. Бул туурасында Статистика боюнча мамлекеттик комитеттен кабарлашты.
"Акыркы жылдардын ичинде Кыргызстандын айыл чарба сектору туруктуу оң динамикага жете алган жок. Ушул эле учурда, айыл чарбасынын ИДПнын жалпы көлөмүндөгү үлүшү 2014-жылы 14,7 пайыздан 2018-жылы 11,7 пайызга чейин кыскарды", — деп айтылган маалыматта.
2018-жылы өсүмдүк өстүрүү продукциясынын көлөмү андан мурдагы жылга салыштырмалуу 108,2 миллиард сомдон 100,5 миллиард сомго чейин төмөндөгөн. Бул картошканы (29,0 пайызга), жашылчаны (17,8 пайыз), бакча жемиштерин (6,1 пайыз) жана жүзүмдү (8,8) өндүрүүнүн кыскарганы менен түшүндүрүлөт.
2018-жылы бул тармакка негизги салым Чүй, Ош, Жалал-Абад, Ысык-Көл жана Талас облустарынын чарбаларына туура келди.
Кыргызстан агрардык өлкө, анын калкынын үчтөн экиси (66 пайызы) айыл жеринде жашайт.
