БИШКЕК, 9-янв. — Sputnik. Үй-бүлөдөгү зомбулук — бул бүтүндөй коом үчүн трагедия. Үрөй учурган фактыларды мамлекет көз жаздымда калтырбайт. Бул тууралуу Мухаммедкалый Абылгазиев билдиргенин өкмөттөн маалымдашты.
Премьер-министрдин айтымында, 2020-жыл — Аймактарды өнүктүрүү, өлкөнү санариптештирүү жана балдарды колдоо жылы деп жарыяланганын эске алуу менен өкмөт аялдардын жана балдардын укуктарын, кызыкчылыктарын коргоо ишин күчөтүүгө ниеттенүүдө.
"Баткен жана Нарын облустарында жаш энелердин өлүмүнө алып келген үй-бүлөлүк зомбулук фактылары тууралуу жаңылыктар өлкөнү дуу кылды. Келиндер күйөөлөрүнүн колунан каза табышты, кылмышкерлер катаал жазага тартылышы керек. Үй-бүлөдөгү зордук-зомбулук бир бүлөнүн жеке көйгөйү эмес, бул укук бузуу! Коом буга көз жумуп койбошу керек. Зомбулук көрсөткөн адамды актай турган себеп жок, болбойт дагы. Үй-бүлөдөгү ынтымак менен ырашкерлик — бул жогору баалап, коргой турган жашоодогу маанилүү баалуулук экенин ар бир адам түшүнүүсү зарыл. Ден соолугу чың, бактылуу аялзаты — бул бейпил үй-бүлөнүн жана бакубат улуттун кепилдиги", — деди Абылгазиев.
Премьер-министр жарандарды үй-бүлөдөгү зордук-зомбулуктан коргоону камсыз кылуу механизмдерин жакшыртуу боюнча улуттук мыйзамдарды өркүндөтүү иштерин активдештирүүнү тапшырды.
Абылгазиевдин айтымында, бул иш жарандык коомдун жана эл аралык уюмдардын өкүлдөрү менен тыгыз кызматташуунун негизинде аткарылышы керек.
Премьер-министр Ички иштер министрлигине, Эмгек жана социалдык өнүктүрүү министрлигине жергиликтүү өз алдынча башкаруу уюмдары менен биргеликте үй-бүлөдөгү зордук-зомбулук маселеси боюнча калк арасында түшүндүрүү иштерин күчөтүүнү тапшырды.
Эске салсак, жаңы жылда Баткен шаарында 31 жаштагы келин ур-токмоктон каза тапкан. Кийинчерээк Кочкордо дагы 37 жаштагы келиндин киши колдуу болгону ачыкталды. Эки учурда тең шектүү катары келиндердин жолдоштору кармалган.
