БИШКЕК, 8-дек. — Sputnik. Футбол тууралуу өз божомолун сунуштаган football-rankings.info сайты 2022-жылкы дүйнө чемпионатынын кийинки туруна чыгууга Кыргызстандын курама командасынын мүмкүнчүлүгү бар экенин жазып чыкты.
Кыргызстан F тайпасында Тажикстанды кошумча көрсөткүчтөр менен артта калтырып, экинчи орунда келе жатат. Бирок бардык командалар дагы 3-4 жолу беттеш өткөрүшү керек.
Буга чейинки божомолдору туура чыгып жүргөн сайт командалардын мүмкүнчүлүгүн төмөнкүчө баалады.
Лидерлер Сирия, Япония жана Австралиянын мүмкүнчүлүктөрү — 99 пайыздан. Оман жана Түштүк Кореяныкы — 90-94 пайыз.
Кыргызстандын курама командасы 9,03 пайыз менен 21-орунда турат. Ал эми биздин тайпадагылар (Япониядан башкасы) төмөнүрөөк жайгашкан. Мисалы, Тажикстан — 4,81, Мьянма — 0,16, Монголия — 0.
