БИШКЕК, 28-ноя. — Sputnik. Кыргызстандын футбол командасынын FIFA рейтингиндеги позициясы артка кетип, 96-орунга түшүп калды. Бул туурасында өлкөнүн Футбол федерациясы билдирди.
Жаңыланган рейтинг бүгүн, 28-ноябрда, жарыяланды.
Ноябрь айында КР футболчулары 2022-жылы өтө турган дүйнө чемпионатынын тандоо турунун алкагында эки оюн өткөрүп, атаандаштарды өз талаасында кабыл алышкан. Кыргызстандык команда Япониядан 0:2 эсебинде утулуп калса, Тажикстан менен 1:1 эсебинде тең чыккан. Ал эми Өзбекстан менен жолдоштук беттеш өткөрүп 1:3 эсебинде утулуп калган.
Натыйжада улуттук команда FIFA рейтингинде ноябрь айына салыштырмалуу эки орунга артка жылып, 96-сапты ээледи.
Ал эми Азия футбол конфедерациясынын рейтинги боюнча Кыргызстан 14-орунда турат.
Дүйнөлүк рейтингдин сап башына Бельгия, Франция, Бразилия чыкты.
