БИШКЕК, 30-ноя. — Sputnik. Кыргызстандын Стамбулдагы мурдагы башкы консулу Эркин Сопоковдун баш коргоо чарасы тандалды. Бул тууралуу Бишкек шаарынын Биринчи май райондук сотунун өкүлү Асель Равшанбекова Sputnik Кыргызстан агенттигине билдирди.
Анын айтымында, Сопоков УКМКнын тергөө абагында 2020-жылдын 28-январына чейин калтырылды.
Равшанбекова белгилегендей, прокурордун өтүнүчү канааттандырылып, Сопоковдун кармалышы негиздүү жана мыйзамдуу деп табылды.
Эске салсак, Эркин Сопоковдун дипломатиялык номер тагылган унаасы Айэркен Саймаити өлтүрүлгөн жерден алыс эмес тараптан табылган.
Эркин Сопоковду комплекстүү текшерүү иш-аракеттеринин жыйынтыгында Кыргызстандын Башкы прокуратурасы тарабынан Кылмыштардын жана жоруктардын бирдиктүү реестрине катталып, сотко чейинки териштирүү иштери УКМКнын тергөө башкармалыгына жиберилген:
- Кыргызстандын Кылмыш-жаза кодексинин 320-беренесинин 2-бөлүмү ("Кызмат абалынан кыянаттык менен пайдалануу") боюнча катталган Эркин Сопоков тарабынан дипломатиялык номери менен "Лэнд Ровер – Рэндж Ровер" үлгүсүндөгү өздүк автоунаасын Айэркен Саймаитиге жана башка тараптарга мыйзамсыз берген фактысы;
- Кыргызстандын Кылмыш-жаза кодексинин 323-беренесинин 2-бөлүмүнүн 2-пункту ("Мыйзамсыз баюу") боюнча катталган Эркин Сопоковдун 200 000 доллар өлчөмүндө акча каражатына ээ болуп, 47,6 миллион сомго турак жай сатып алып, мыйзамсыз байыган фактысы;
Учурда сотко чейинки териштирүүнүн алкагында Айэркен Саймаитиге карата болгон коркутуулар боюнча маалыматтарды толук кандуу жана объективдүү жүргүзүү максатында бардык жагдайларды аныктоого багытталган тиешелүү тергөө иш-чаралары жүрүп жатат.
