БИШКЕК, 27-ноя. — Sputnik. Казакстандын президенти Касым-Жомарт Токаев Кыргызстанга мамлекеттик сапары менен келди. Аны аэропорттон президент Сооронбай Жээнбеков өзү тосуп алды.
Эки мамлекет башчысы "Ата-Бейит" мемориалдык комплексине барып, улуу жазуучу Чыңгыз Айтматовдун күмбөзүнө гүл коюп, куран түшүрүштү.
Андан соң тараптар "Ала-Арча" мамлекеттик резиденциясында алгач тар чөйрөдө, андан кийин кеңири курамда жолукту. Жыйын учурунда Сооронбай Жээнбеков Касым-Жомарт Токаевге мамлекеттик сапары менен келип кетүү чакыруусун кабыл алганына ыраазычылык билдирди.
"Кыргыздар менен казактар — бир тууган элбиз. Биздин өңүбүз, тилибиз, каада-салтыбыз, маданиятыбыз опокшош, дилибиз да бир. Элибизде "алыскы туугандан жакынкы коңшу артык" деген жакшы сөз бар. Кыргызстандын тышкы саясатындагы артыкчылыктуу багыттардын бири Казакстан менен кызматташууну мындан ары өнүктүрүү болуп саналат", — деди Жээнбеков.
Ал өз сөзүндө Казакстан менен Кыргызстандын ортосунда ар тараптуу, анын ичинде соода-экономикалык кызматташтык өнүгүп жатканын белгиледи.
Токаев эки мамлекеттин карым-катнашындагы жагдайлар, чек аралардын чектешкени, транспорт жолдору жана ЕАЭБге мүчө болгондугу да маанилүү ролду ойной турганын айтты.
"Кыргызстан Казакстандын Борбор Азиядагы мамлекеттер арасында экинчи соода өнөктөшү. Эки мамлекеттин ортосундагы товар айлануу үч жылдан бери өсүү жолунда", — деди ал.
Бүгүнкү эки тараптуу жолугушуулардын жыйынтыгында бир катар документтерге кол коюу пландалган.
