БИШКЕК, 6-окт. — Sputnik. Милиция курал колдонуп каракчылык кылган деп шектелген кишини кармагандыгын
Бишкек милициясынын маалымат кызматынан кабарлашты.
4-октябрда И.С. аттуу жаран аны сабап жана батирде күч менен кармап отурушуп, андан соң тоноп кеткендерге чара көрүүнү суранып, арызданган. Маалыматка караганда, алар аталган жаранды болжол менен саат 16:00дөн 21:00гө чейин Бишкектеги Тоголок Молдо көчөсүндөгү көп кабаттуу үйдөгү батирлердин биринде кармап отурушкан. Берген көрсөтмөлөрүнө караганда, бычак жана курал менен коркутуп, опузалап, андан соң үч миң долларын ала кетишкен.
Бул факты Кылмыш жана жоруктардын реестрине "Каракчылык" беренеси менен катталган.
"Милиция ал кишини кайда кармап турушкандыгын тактап, саат 23:00дө ыкчам тинтүү жүргүзгөн. Анткен менен буга үйдөгү киши каршылык көрсөтүп, милицияга бычак ала жүгүргөн. Тартип сакчылары аны тез эле куралсыздандырып кармашкан", — деп айтылат маалыматта.
Батирди тинте келгенде УЗИ үлгүсүндөгү курал жана баңгизатка окшогон жашыл түстөгү чөптүн бир нече ыкма менен даярдалган түрлөрү табылган.
Тинтүү учурунда араб тилиндеги китептер чыккан. Бул боюнча да иш козголгон.
Кармалган жаранды Бишкек милициясынын убактылуу кармоо жайына киргизишип, тиешелүү экспертизалар дайындалган. Маалыматта тартип сакчыларынын эми калган шектүүлөрдү издеп жаткандыгы айтылды.
