БИШКЕК, 2-окт. — Sputnik. www.portal.srs.kg электрондук кызматтар порталында Carcheck сервиси ишке кирди. Аны транспорт каражаты тууралуу маалыматты билүү үчүн колдонсо болорун Мамлекеттик каттоо кызматынын маалымат катчылыгынан билдиришти.
Сервисти "Инфоком" ишканасы иштеп чыккан.
"Carcheck автоунаа жөнүндө кызыктуу маалыматтарды билгенге жардам берет. Мисалы, машина күрөөдө турган-турбаганын, жол эрежесинин бузулушу боюнча айып пулдардын суммасын, мурдагы кожоюндары жана айрым учурда техникалык мүнөздөмөлөрү тууралуу маалымат берет", — деп айтылат билдирүүдө.
"Кызматтын негизги өзгөчөлүктөрүнүн бири автоунааны сатып алып жаткан адам кийин көйгөйлөр жаралып калбашы үчүн алдын ала текшерип алса болот", — деп түшүндүрүштү Мамкаттоо кызматынан.
Долбоор ушул жылдын 1-октябрынан тарта 2020-жылдын 1-апрелине чейин пилоттук негизде иштейт.
