БИШКЕК, 15-сен. — Sputnik. Афганистанда "Ислам мамлекети" уюмуна мүчө болгондордун саны жогору чегине жетип калды. Бул тууралуу РИА Новости Тажикстандагы аскерий жетекчилерге таянып жазды.
Маалыматты стратегиялык-командалык "Центр-2019" машыгууларынын ачылышында Тажикстандын аэромобилдик күчтөр штабынын башчысы Жахонгир Назаролизод айткан.
Ал окуулардын жогорудагыдай кабардан кийин маанилүү экендигин баса белгилеген.
"Ислам мамлекети" уюмунун Сирия менен Ирактагы талкаланышынан кийин, башында тургандар аларды топторго бөлүштүрүп, негизги басымды Афганистанга жумшоого багыттаган. Үгүттөп жана өз катарына тартуу боюнча жүргүзгөн иштерден улам, Афганистандагы аталган уюмдун мүчөлөрүнүн саны жогорку чекке жетип калды", — деп коңгуроо каккан Назаролизод.
Полковник бул факты коопсуздук жаатындагы ойлонто турган себеп экендигин баса белгилеген.
"Афганистан — көп жылдык маданияты бар, "Центр-2019" машыгуусуна мүчө мамлекеттер менен чектешкен мамлекет. Бул, албетте, биздин коопсуздугубуз жөнүндө ойлоонууну эскерткен маселе экени талашсыз. Тажрыйба көрсөткөндөй, кылымдын бул көйгөйү менен биргелешип күрөшүүбүз керек. Мындан улам, "Центр-2019" машыгуусун өткөрүү актуалдуу болуп турат", — деп кошумчалаган Назаролизод.
"Центр-2019" машыгуусунун негизги бөлүгү 16-21-сентябрда өтөт. Ага Россия, Кыргызстан, Кытай, Пакистан, Индия, Казакстан, Тажикстан жана Өзбекстан катышууда. Бул иш-чарага жалпысынан 128 аскер катышмакчы. Андан сырткары, 20 миң аскер техникалары жана курал-жарак, 600гө чукул учуучу аппараттар жана 15 кеме колдонулат.
