Бишкекте аёосуз сабалгандар: УКМК эки милиционерди кармады

БИШКЕК, 7-сен. — Sputnik. Бишкекте эки кишини аёосуз сабаган жарандарды окуя болгон жерден качырып кеткен делип Бишкек ШИИБдин кайгуул-күзөт милициясынын эки кызматкери кармалды. Бул тууралуу УКМКнын маалымат кызматынан билдиришти.

Эске салсак, 28-августта болжол менен саат 7.00дөр чамасында Бишкек ШИИБге Жал кичи районундагы супермаркеттин жанында кишилердин мушташып жатканы кабарланган. Жерине Милициянын кайгуул-күзөт кызматынын төртүнчү ротасынын кызматкерлери барган. Мындан сырткары, Чүй ОИИББдин кызматкери Казыбек Бапышев дагы келип, эки шектүүнү алып кеткен. Жабырлануучулар болсо ооруканага жеткирилген.

Кийин ички иштер органдарынан билдиришкендей, милициянын майору Казыбек Бапышев иштен алынган. Ал шектүүлөрдүн агасы экени белгилүү болуп, учурда кылмыш иши козголду. Мындан сырткары, милициянын эки кызматкери иштен алынып, дагы экөө катуу сөгүш алган.

Белгилей кетсек, кылмышка шектүү делген Жаныбек Бапышев менен Калысбек Сеитбеков бир нече күн изделгенден кийин 6-сентябрда милицияга өздөрү келишкен. 

"Казыбек Бапышев менен сүйлөшүп алып, кылмышка катыштыгы бар жарандарды жашырып койгон делип Э.С. жана М.К аттуу кызматкерлер кармалды", — деп айтылат билдирүүдө.

Укук коргоочулар Жазык кодексинин 320-беренеси ("Кызмат абалынан кыянаттык менен пайдалануу") жана 348-беренеси ("Кылмышты жашыруу") боюнча шектүү катары каралып жатат. Тергөө амалдары менен УКМК алектенүүдө.