Ирландиялык UFC мушкери Конор Макгрегордун Дублиндеги барда улгайган адамга кол көтөргөн видеосу интернетке тараганын РИА Новости жазды.
Окуя ушул жылдын апрель айында болгону айтылат. Конордун жоругу камера көзөмөлүнө түшүп калган. Анда Макгрегор барга келип, чогулгандарды өзүнүн брендиндеги виски менен сыйлаган. Бирок отургандардын бири анын суусундугун ичүүнү каалаган эмес. Мушкер улгайган адамдын маңдайына рюмканы койсо, ал баш тартып койгон.
Алар кайым айтышканы же айтышпаганы белгисиз. Видеодон Конор карыган адамды бетке бир чапканын көрүүгө болот. Эркек киши унчуккан эмес. Андан соң эки адам ирландиялык мушкерди сыртка алып чыгып кеткен.
Маалыматта Дублиндин полициясы окуяны иликтеп баштаганы айтылат, бирок анын жыйынтыгы белгисиз.
Макгрегор соңку беттешин былтыр 6-октябрда UFC 229 турниринин алкагында өткөрүп, россиялык спортчу Хабиб Нурмагомедовго утулуп калган. Ирландиялык спортчу аралаш мушташ боюнча 21 мелдешти утуп, төрт ирет жеңилүү ызасын тарткан.
