БИШКЕК, 15-авг. — Sputnik. Арыктап, сөөгү эле калган пилдин сүрөтү социалдык тармактын колдонуучуларын таңыркатты. Жаныбардын сүрөтүн Таиланддагы Пилдерди коргоо фонду Facebook баракчасына жарыялады.
Сүрөт Шри-Ланкада өткөн буддисттердин Эсала Перахера фестивалында тартылган.
Фонддун маалыматына караганда, Тикири деген пил 10 күн катары менен түтүн, фейерверк жана ызы-чууда шоуга катышып турган. Ал иш-чарага катышкан 60 пилдин бири болгон.
Кабыргасы саналып калган пилге шоу учурунда кооз кездеме жаап коюшкан.
"Башкалардын жашоосуна балта чабуу менен фестивалды кантип ыйык деп атаса болот?" — деп соцтармактын колдонуучулары суроо салды.
Эсала Перахера фестивалы жыл сайын Шри-Ланкада өткөрүлүп келет. Буддисттер бир нече кылым мурда Кандиге алып келинген Будданын ыйык тишине сыйынып келишет.
