БИШКЕК, 9-авг. — Sputnik. РФ премьер-министри Дмитрий Медведев Чолпон-Ата шаарында өтүп жаткан Евразиялык өкмөттөр аралык кеңешинин жыйынына катышып, ЕАЭБдин Кыргызстандагы ишкерлер үчүн түзгөн ыңгайлуулуктарын атап өттү.
Анын айтымында, акыркы жылдары Евразиялык өкмөттөр аралык кеңеши бир нече тоскоолдуктарды жойгон.
"Кеңештин эки жарым жылдык ишинде 55 экономикалык жана административдик тоскоолдуктардын 37си жоюлду. Келишимди ишке ашыруу үчүн чоң иштер жасалды. Кыргызстандын ветеринардык-санитардык көзөмөл системасынын ЕАЭБде таанылышы быйылкы ийгиликтердин бири болду. Өз кезегинде Кыргызстан үчүн евразиялык рынок толук ачылды", — деди Медведев.
Ал ошондой эле экономикалык биримдикте 180 миллион колдонуучу бар экенин, алардын байланышына эч нерсе тоскоол болбошу керектигин кошумчалады.
Евразиялык өкмөттөр аралык кеңешинин жыйыны Чолпон-Ата шаарындагы "Рух-Ордо" маданий борборунда өттү. Жыйындын соңунда 12 документке кол коюлду.
