БИШКЕК, 30-июл. — Sputnik. Кайрылгандар айрым ЖМКлар ИИМдин Жол кыймылы коопсуздугун камсыздоо башкы башкармалыгына таянуу менен ШКУ саммити учурунда "Коопсуз шаардын" камералары иштебейт деп жазгандарын жүйө келтиришүүдө.
Өзүн Нурлан деп тааныштарган айдоочу Sputnik Кыргызстан агенттигинин кабарчысына 13-14-июлда Бишкекте ШКУ саммити өткөн маалда ири жол тыгындар жаралганын айтып, айрым айдоочулар жол эрежелерин бузууга аргасыз болгонун билдирди.
"Бул күндөрү Бишкекте машина айдай албай калганбыз, бир нече сааттап тыгында турдук. Ошол маалда айрым ЖМКлар саммиттен улам көчөлөргө коюлган камералар иштебей турганын жазышкан. Аны окугандан кийин эреже бузууга туура келген", — деди ал.
Бирок Нурлан ага карабастан айдоочулар дал ушул саммит өткөн күндөрү жол эрежесин бузганы үчүн айып пулдарды алып жатканын кошумчалады. Мындай кат алгандардын көпчүлүгү айып төлөбөй, сотко кайрыла турганын айтышууда. Саммитке даярдык көрүү боюнча өткөн маалымат жыйындарынын биринде ЖКККББнын жетекчиси Азамат Исраилов эреже бузгандар каттоого алынбай турганын айтканын белгилеп жатышат.
"Саммит учурунда көчөлөрдүн кесилишин милиция кызматкерлери тескейт. Андыктан "Коопсуз шаардын" камералары кызыл жарыкка өтүп кеткендерди жана башка эреже бузууларды каттабайт", — деп айткан Исраилов.
Бул жаңылык чыккандан кийин ЖКККББнын маалымат кызматы саммит учурунда камералар кортеж өтүп жаткан учурда гана иштебей турганын билдирген. Кортеж өтө турган жолдордун тизмеси да жарыяланган болчу.
ЖКККББнын маалымат катчысы Тилек Исаев ошол маалда Исраилов камералардын өчүрүлүшү боюнча алдын ала маалыматтарды гана айтканын билдирди.
"Алгач бул тууралуу маалымат гана болгон, кийин ал такталып, камералар коноктордун автоунаасы өтүп жаткан гана көчөлөрдө иштебей турганы айтылган", — деди ал.
Тилек Исаев ошондой эле кандай гана жагдай болбосун айдоочулар жолдо жүрүү эрежелерин сакташы керектигин баса белгиледи. Андан сырткары, ал эгер эреже бузганы боюнча түзүлгөн протокол боюнча шек жаралса, ЖКККББнын мониторинг борборуна кайрылса болорун кошумчалады.
