ЫСЫК-КӨЛ, 3-июл. — Sputnik. Ысык-Көл районунун мектептери электрондук системага өтүүдө. Бул тууралуу Ысык-Көл районунун акими Данир Иманалиев билдирди.
Маалыматка ылайык, 2-июлда Ысык-Көл районундагы мектептердин директорлору менен мугалимдери үчүн атайын жыйын уюштурулуп, анда аталган система боюнча толук маалымат берилди.
"Бул системаны долбоордун негизинде киргизип жатабыз. Анын алкагында мектептеги мугалим менен ата-эненин ортосундагы байланыш бекемдейт. Анткени окуучунун бардык жетишкендиктери тууралуу маалымат электрондук системага өтөт. Ата-энелер каалаган жеринен баласы тууралуу интернет аркылуу түздөн-түз маалымат ала алат", — деди Иманалиев.
Иманалиев ошондой эле системанын чөнтөк телефонго ыңгайлашкан версиясы бар экенин айтып, аны уюлдук телефонго орнотуп алса болорун кошумчалады.
"Акылдуу мектеп" долбоору россиялык "Веб-мост" компаниясы менен Москва шаарында өткөн "Ысык-Көл форумунда" район жетекчилиги тарабынан макулдашылып, ишке ашырылды.
