Кордолгон жубайын муунтуп өлтүрүп... Июндагы соттук чечимдер

Өтүп кеткен ай өлкөдөгү соттор үчүн оор айлардын бири болду. Алар түрдүү мүнөздөгү жүздөгөн иштерди карап чыгып, айрымдарына чекит койду. Sputnik Кыргызстан агенттиги июндагы чуулуу, адам өмүрүн алган соттук өкүмдөрдү сунуштайт.

Бир тууган агасын бычактап...

36 жаштагы жаран өзүнүн бир тууган агасы менен үйдө арак ичип отуруп уруша кеткен. Ортодо чыр чыгып, иниси агасын бычактаган. Жабырлануучунун оор абалда көчөдө отурганын кошуналары көрүп Тез жардам чакырткан. Бирок көп өтпөй ал ооруканадан үйүнө качып келип, эки күндөн кийин каза болуп калган. Айыпталуучу кылганын мойнуна алып, адам өмүрүн алган каргаша арактын кесепетинен болгонун билдирген. Ал эми маркум менен соттолуучунун энеси уулун эркиндикке чыгарууну өтүнгөн. Бирок фемида өкүлдөрү төрт баланын атасын 7,5 жылга темир тор артында калтырып, 130 миң сом айып салган.

Аткезчилердин атышуусу

Чек арадагы көзөмөл өткөрүү пункттарынын биринде аткезчилер ортосунда чыр чыгып, атышууга чейин жеткен. Окуяда ок жегендер да болгон. Сот отурумда жабырлануучу Усенов шектүү делген Бейшенкулов чек арадан өткөн ар бир унаага 10 миң сомдон берип турасың деп талап койгондуктан уруша кеткендигин айткан. Соттолуучу болсо ал жерде тапанча колдонгондугун жашырган эмес. Коомчулукта чуу жараткан атышуу боюнча сот айыпталуучуну 270 миң сом айыпка жыкты.

Аялын 8-мартта сабап өлтүргөн

Үйдө арак ичип отурган жубайлар тааныштарын тосуп түн ортосуна чейин майрамдашкан. Ошондо жолдошу көчөгө чыгып тамеки чегип отурганда мейман болуп келген эркек анын аялын күч колдонуп зордуктап салган. Идиш-аяк кагышканын уккан үй ээси бөлмөгө кирип, анын жарым жылаңач жатканын көрүп, стакандашын сабап кубалап жиберген. Андан соң келинчегин муунтуп, балтанын сабы менен башка койгулап өлтүргөн. Алты айлык ымыркайды энесиз калтырган "күйөө" эми 13 жыл өмүрүн темир тор артында өткөрөт.

Бийкечти тиши түшкөнчө сабаган

Бойдок, мурда соттолгон эркек тааныш бийкечин кафеге жолугушууга чакырат. Алар кезигип тамактанып, андан соң жигит кызды үйүнө автоунаа менен жеткирмекчи болот. Катуу айдап, кыздын жүрөгүн түшүрөт. Жайыраак айдоону өтүнгөн селкини жигит сөрөй унааны токтотуп, кызды сыртка сүйрөп чыгып тепкилеген. Бийкечтин бети-башы көгала болуп, баш мээси чайкалып, тиши да түшүп калган. Чоң муштум сүйгөнүнө 10 миң сом моралдык чыгым төлөмөр болуп кылмыш жоопкерчилигинен кутулду.

Абышканы сабаган аракеч

Мас болгон 41 жаштагы киши көчөдө кетип бараткан 90 жаштагы абышканы башка чапкан. Дарыгерлер карыя кулаганда буту сынганын аныктаган. Жабырлануучуга эки жолу операция жасалып, ага карабай ал басуу мүмкүнчүлүгүнөн ажыраган. Териштирүү маалында күбөлөр менен ооруканада жаткан жаран шектүүнү эстеп калгандыгын билдирип, укук коргоо кызматкерлерине көргөзүп берген. Бирок айыпталуучу аны такыр көрбөгөндүгүн айткан. Адамдын өмүрүнө кол салган аракеч беш жылга кесилди.

Тоодогу каргаша

Үч дос тоого эс алганы жөнөйт. Өз ара тамашалашып бир шеригинин аскерге барбаганын, анын каруусу жок экенин сөз кылып, шакаба чегишет. Биз кезде анын ачуусу келип, тамашакөй досун бычак менен сайып, аңга түртүп жиберген. Ал эми үчүнчүсү канжалаган досуна жардам берүүгө аракет кылган, бирок ал окуя болгон жерде көз жумган. Соттолуучу эми темир тор артында 16 жылга камалып, маркумдун атасына 200 миң сом айып пул төлөйт.

Кандуу майрам

Каргаша болгон күнү Александр менен Ирина үйүндө конок тосуп, арак ичип отурган. Бир маалда меймандардын бири Анна үйдүн кожойкесине 300 сомду качан бересиң деп доолайт, Ирина болсо азырынча акча жок экендигин айткан. Ошондо Аннанын жолдошу Евгений "Акчаң жокпу, иштеп бер!" — деп кыйкырып жиберет. Жыйынтыгында эки эркек мушташып, үй ээси Евгенийди бычак менен сайып тынчыткан. Александр сегиз жылга соттолуп, 90 миң сом төлөмөр болду.

Арактын айынан

Марина ал күнү жакын мамиледе болгон Улан менен Мирбекти конокко чакырып, үчөө арак ичип үйдө уктап калган. Түн ортосунда Улан Маринаны уктатпай жыныстык катнашка барууга аракет кылган, бирок сулуу ага макул болбой коёт. Экөөнүн кобурунан ойгонуп кеткен Мирбек кыздын жанын койбой жаткан жигитти бөтөлкө менен башка чапкан. Анысы аз келгенсип эс-учун жоготуп жаткан Уландын өлүү-тирүүсүн билүү үчүн бутуна ысык суу куюп көргөн. Мындай мыкаачылыгы үчүн ал үч жылга эркинен ажыратылды.