БИШКЕК, 22-июн. — Sputnik. Экс-президент Алмазбек Атамбаевдин Кой-Таштагы үйүнүн жанына тарапташтары чогулууда. Бул тууралуу Sputnik Кыргызстан агенттигинин жерине барган кабарчысы билдирди.
Алдын ала маалымат боюнча, учурда 150гө чукул жергиликтүү тургун топтолду.
Ал эми КСДП фракциясынан депутат Ирина Карамушкинанын айтымында, экс-президенттин үйүнө жакындары, достору жана аксакалдар саясий кырдаалды талкуулоо үчүн чогулуп жатышат.
"Экс-президенттин тарапташтары жолугушуу уюштурууну өздөрү демилгелеген. Алмазбек Шаршенович үйдүн аймагынан милиция кызматкерлерин көрбөгөнүн айтты. Мен Кой-Ташка барганда жол инспекторлору көп болчу. Жеке пикиримде, Алмазбек Шаршенович тыкыр көзөмөлдө", — деди Карамушкина.
Ал эми 20-июнда Жогорку Кеңештин депутаттары Алмазбек Атамбаевди макамынан ажыратуу боюнча токтомго добуш берип, корутунду Башкы прокуратурага жөнөтүлгөн. Эми башкы көзөмөл орган айыптоолорго юридикалык баа бериши керек.
Көп өтпөй экс-президенттин коомдук башталыштагы кеңешчиси Кундуз Жолдубаева социалдык тармактагы баракчасы аркылуу Атамбаевдин бул маселе боюнча жообун таратты. Анда Атамбаев өз дарегине айтылып жаткан айыптоолорду жалган деп, "учурдагы президенттин саясий атаандашын четтетүүгө болгон умтулуусу" катары баалады.
