БИШКЕК, 4-июн. — Sputnik. Мурдагы башкы прокурор Аида Салянова кримтөбөл Азиз Батукаевдин Кыргызстандан чыгып кетиши боюнча козголгон кылмыш ишинин алкагында кармалып, Бишкек ШИИБдин убактылуу кармоо жайына киргизилди. Бул тууралуу анын жактоочусу Рабига Сыдыкова билдирди.
Учурда Салянованын жактоочулары шаардык милициянын имаратынын алдына чогулууда. ШИИБдин имаратына Салянованын жактоочусу жана депутат Наталья Никитенко кирип кетти.
Белгилей кетсек, Салянованы 3-июнда саат 15:00дөр чамасында үйүнөн сурак берүү үчүн ИИМдин имаратына алып кетишкен. Түнкү саат 12:00дөр чамасында аны ШИИБге алып келишкен.
Буга чейин экс-депутат Асия Сасыкбаева Аида Салянованын баш коргоо чарасы 4-июнда каралышы ыктымалдыгын билдирген болчу.
Аида Салянова кримтөбөл Азиз Батукаев Кыргызстандан чыгып кеткен учурда башкы прокурор кызматын ээлеп турган.
Батукаевдин иши
2019-жылдын 17-апрелинде башкы прокурор Өткүрбек Жамшитов Жогорку Кеңеште отчёт берип жатып Батукаевдин мыйзамсыз бошотулушу боюнча кылмыш иши жанданганын билдирип, көп өтпөй Батукаевге диагноз койгон онколог, лаборатория кызматкери камакка алынган. Андан кийин ошол кезде Саламаттык сактоо министрлигин жетектеп турган Динара Сагинбаева, ЖАМК төрагасынын мурдагы кеңешчиси Калыбек Качкыналиев, ошол учурда вице-премьерликти аркалаган Шамил Атаханов камакка алынган.
Аламүдүн райондук соту Батукаевди 16 жыл 8 айга эркинен ажыраткан. Соттун чечими менен жаза мөөнөтүнүн жарымы өткөндө абактан чыгарылган.
Бул иштин алкагында ошол кезде Жаза аткаруу мамлекеттик комитетин жетектеп турган азыркы депутат Зарылбек Рысалиев да суракка чакырылган.
Көп өтпөй Батукаевди камактан бошотуу өкүмүн чыгарган Нарын шаарынын мурунку судьясына да кылмыш иши козголгону белгилүү болду.
