БИШКЕК, 6-апр. — Sputnik. Кыргызстан социал-демократиялык партиясынын мурдагы саясий кеңеши ишин токтотуп, жаңы курам шайланды. Бул тууралуу экс-президент Алмазбек Атамбаев партиянын бүгүн өткөн XVIII съездинен кийин журналисттерге брифинг өткөрүп жатып билдирди.
Бүгүн, 6-апрелде, Бишкек шаарында КСДПнын курултайы жабык эшик артында өттү. Ага чакырылган 180 делегаттын 170и катышканы айтылды.
"Съезд абдан жемиштүү өттү. Негизги чечимдер кабыл алынды. Мисалы, мурдагы саясий кеңеш ишин токтотуп, жаңы курам шайланды. Алардын катарына Жогорку Кеңештин — азыркы парламенттин депутаттарынан 7 адам кирди. Мындан тышкары, күч органдарына кайрылуу даярдадык", — деди Атамбаев.
Экс-президент партия жетекчилигинин курамы боюнча өзгөрүүлөр болбогондугун кошумчалады.
Кеңештин курамына Жогорку Кеңештин депутаттарынан Анвар Артыков, Ирина Карамушника, Асел Кодуранова, Рыскелди Момбеков, Карамат Орозова, Альфия Самигулина жана Мурадыл Мадеминов кирди. Булардан тышкары, тизмеден эск-президент Алмазбек Атамбаев, мурдагы премьер-министр Сапар Исаков, экс-мэрлер Албек Ибраимов, Кубанычбек Кулматов сыяктуу саясатчыларды жана бир катар журналисттерди көрүүгө болот.
"Мен партиянын лидери бойдон калам. Анткени эл-жерге күйөм, дагы иштешим керек", — деди экс-президент.
Эске салсак, буга чейин бир нече күн мурда КСДП расмий түрдө оппозицияга өткөнүн билдирген эле.
