БИШКЕК, 20-мар. — Sputnik. Кыргыз-казак чек арасынын "Ак-Тилек" өткөрүү пунктунда Кыргызстандан бара жаткан жүк ташуучу унаалар узун кезекке туруп калды. Бул тууралуу КРдин Чек ара кызматынан кабарланды.
Билдирмеге караганда, мындай көрүнүш 19-мартта 20.00дөн тарта башталды.
"Казакстандын чек арачылары тарабынан унааларды текшерүү мөөнөтү узартылгандыктан, кезек күткөндөр көбөйүп кетти. Бүгүн, 20-мартта, саат 9.00дө өтө албай турган фуралардын саны 90го жетти", — деп айтылат билдирүүдө.
Ошондой эле казак тарап саатына 4-5 унааны текшерип жатканы кошумчаланды.
Эки өлкөнүн чек арасындагы башка өткөрүү пункттарында мындай көрүнүш жок.
Ал эми Кыргызстандын чек арачылары коңшуларды эч тоскоолдуксуз өткөрүп жатканы кошумчаланды.
