Коомдук тамактануучу жайларга кардарлар өздөрү менен тамак-аш алып барууга тыюу салынган. Бул тууралуу Махамат Мурзашев Sputnik Кыргызстан радиосунун таңкы эфиринде маек куруп жатып билдирди.
Анын айтымында, коомдук тамактануучу жайлардын ээлери кардарлардын саламаттыгына жоопкер.
"Тез татым, кафе, ресторан, коомдук тамактануучу жайлардын ээлери кардарлардын саламаттыгына жоопкер болот. 2011-2013-жылдары Бишкектин "Арал", "Енисей" кафелеринде уулануу фактысы катталып, 100дөн ашуун адам жабыркаган. Ошондон кийин Саламаттык сактоо министрилигинин башкы санитардык дарыгеринин токтомуна ылайык, кафе, ресторандардагы той-топур, банкетке кардарлар каражатты үнөмдөө максатында өздөрү менен тамак-аш алып барууга тыюу салынган. Бирок мыйзам боюнча биз иш убактысында гана ал жайларды текшерүүгө ала алабыз. Ал эми той, банкеттер кечке маал өтөт. Негизинен үй консерваларынан уулануу эң кооптуу болуп эсептелет", — деди Мурзашев.
Ошондой эле дарыгер 2018-жылы Бишкек шаары боюнча жалпысынан уулануу боюнча 10 учур катталса, ушул жылдын эки айында эле 11 учур катталгандыгын белгиледи.
