БИШКЕК, 6-мар. — Sputnik. Беш-Күнгөй айылында тонолгон айдоочунун жанында жубайы болгон. Бул тууралуу Чүй облустук ички иштер башкармалыгынан билдиришти.
Эске салсак, 6-мартка караган түнү аталган айылда айдоочуну аткылап, жанындагы 315 миң долларын алып кеткени айтылган.
Жерине Аламүдүн райондук милициясынын ыкчам тобу барган.
"53 жаштагы жаран 57 жаштагы жубайы менен Toyota Harrier унаасында бара жатышкан. Алдын ала маалыматка караганда, аларды Subaru Forester үлгүсүндөгү авто сүзгөн. Андан соң экинчи унаадагы белгисиз адамдар жубайларга ок чыгарып, алар жарадар болгондо 310 миң доллардан көбүрөөк акчасын алып кетип калышкан", — деп айтылат милициянын билдирүүсүндө.
Учурда КРдин Жазыктар кодексинин 202-беренесине ("Каракчылык") ылайык иш козголуп, шектүүлөргө издөө жарыяланды.
Жабыркагандар ар кандай жаракат менен облустук ооруканага жеткирилген.
