БИШКЕК, 4-мар. — Sputnik. Сауд Аравияда өтө турган Camel Fest фестивалына катышчу кыргызстандыктардын айрымдары Эр-Рияд шаарына учуп кеткен. Ушул тапта алар тамактануу жайларында "өздөрүн тартипсиз" алып жүргөнүн Facebook баракчасына кыргызстандык телеканалдардын биринин кабарчысы Бегимай Жаныбекова жазды.
"Сүрөттө өздөрүн патриотпуз деп эсептеген балдар. Калпагын башынан түшүрбөгөнү, албетте, кубандырат. Бирок жүргөн-турганы көңүл айнытарлык болуп жатат. Бизге мындай жарашпайт экен. Даярдаган дасторконго жабыша калып, табактарына тамакты толтуруп алышат. Анысы аз келгенсип бөлмөсүнө ящиктеп суусундук көтөрүп кетет. Же анын баарын түгөтпөйт. Ашканага эртерээк келип калгандары кызматкерлерди шаштысын кетирет", — деп жазды кабарчы постунда.
Camel Fest иш-чарасы 9-марттан 23-мартка чейин өтөт. Анда 98 мамлекеттин өкүлдөрү маданият жана спорт жаатында талантын көрсөтөт. Ага жалпысынан Кыргызстандан 2 миңдей адам катышса, 400ү 2-март күнү жөнөп кеткен.
Ал жактан "Көчмөндөр ааламы" деп аталган этнофестивалын көрсөтүшөт. Кыргызстандыктар үчүн Сауд Аравияда 15 гектар жер берилип, ипподром, этнобазар жана көчмөндөр айылы курулат. Ошондой эле катышуучулардын тамак-ашы, жаткан жери, мал-жаны багылуу болот. Кеткен чыгымдын баарын уюштуруучулар көтөрмөкчү.
