БИШКЕК, 1-мар. — Sputnik. Ош шаарынын мэриясында шаарды жашылдандыруу, көрктөндүрүү жана санитардык тазалоо боюнча жазгы үч айлык өткөрүлөт. Бул тууралуу жергиликтүү муниципалитеттин маалымат кызматы билдирди.
Аталган иш-чаранын алкагында ишембиликтер уюштурулуп, аялдамалар оңдолуп, сырдалып, сырткы көрүнүшү калыбына келтирилет.
Көрктөндүрүү жана жашылдандыруу чарба комбинатынын жетекчиси Айгүл Наватова шаарда бак-дарактардын көчөттөрү отургузулуп, гүл бакчаларды жана газондорду өстүрүү, ошондой эле шаардын аймагындагы арыктарды тазалоо иштери башталганын билдирди.
"2018-жылы Ош шаарынын аймагына 1,6 миллион гүл тигилсе, быйыл 2 миллион гүл отургузулат. Ошондой эле 3 миң түп жазы жана ийне жалбырактуу көчөттөр, 37 миң бадам көчөтү отургузулат. Ар бир мекеме-ишкана, соода-сатык түйүндөрү, көп кабаттуу жана жеке менчик үйлөр биздин комбинат тарабынан отургузулган гүлдөрдү гана карап отура бербестен, өз короолоруна гүл эгүүсүн сунуштайм", — деди ал.
Үч айлыктын алкагында Ак-Буура дарыясынын жээгин тазалоо боюнча атайын иш-чаралардын планы бекитилди.
