Сауд Аравияга Camel Fest фестивалына катышуу үчүн жөнөтүлгөн тайгандар менен алгыр куштар аман-эсен жетти. Бул тууралуу Салбуурун федерациясынын башкы катчысы Елена Соклакова Sputnik Кыргызстан агенттигинин кабарчысына билдирди.
Анын айтымында, жаныбарларды учурда терминалдан мал доктурлар карап жатат.
"Дагы деле терминалдабыз. Бажыдан өтүүдөбүз. Биздин жаныбарлар абдан кызыгуу жаратты. Терминалдагылардын бардыгы куштарды үңүлө карап жатышат", — деди ал.
Соклакова ошондой эле элдин көбү ылаачынга кызыкканын кошумчалады.
28-февралдын таңында Camel Fest фестивалына катыша турган жаныбарлар "Манас" аба майданынан Сауд Аравияга жөнөтүлгөн. Топто 14 топоз, 15 тайган, 15 бүркүт, 5 ителги жана 4 куш бар. Бул үчүн атайын учак жиберилген.
Эскерте кетсек, Camel Fest фестивалы 9-мартта башталып 23үнө чейин созулат. Анда 98 мамлекеттин өкүлдөрү маданият жана спорт жаатында талантын көрсөтөт. Ага катышууга кыргызстандыктарга эң көп — 2000дей квота бөлүнсө, башка мамлекеттерге 15-20дай адамга чакыруу жиберилген. Ал жактан "Көчмөндөр ааламы" деп аталган этнофестивалын көрсөтүшөт. Кыргызстандыктар үчүн Сауд Аравияда 15 гектар жер берилип, учурда ипподром, этнобазар жана көчмөндөр айылы курулат. Ошондой эле катышуучулардын тамак-ашы, жаткан жери, мал-жаны багылуу болот. Кеткен чыгымдын баарын уюштуруучулар көтөрмөкчү.
