Лавров АКШнын Афганистандагы аракеттерин катуу сынга алды

БИШКЕК, 4-фев. — Sputnik. Россиянын тышкы иштер министри Сергей Лавров Кыргызстандын тышкы иштер министри Чыңгыз Айдарбеков менен жолуккандан кийин журналисттердин суроолоруна жооп берип, АКШнын Афганистандагы аракеттери Борбор Азиядагы мамлекеттерге кесепетин тийгизип жатканын айтты.

"Борбор Азия тууралуу сөз кылганда Афганистандан келип жаткан коркунучтар — терроризм, наркотрафик жана туруксуздук тууралуу айтылат. Бул нерсе коопсуздук чараларын күчөтүүнү талап кылууда. Анын ичинде ЖККУнун базасынын ишмердүүлүгү да бар. Биз аны бекемдөө жолдору тууралуу сүйлөштүк", — деди Лавров.

Ал ошондой эле "Москва форматы" аттуу өзгөчө аянтча бар экенин белгилеп, ал жерде афган маселесин Борбор Азиядагы бардык мамлекеттин өкүлдөрү талкуулай турганын белгиледи. Анын ичинде конфликтиге барып жаткан талибдер дагы бар.

"Өкмөт менен талибдердин диалогу баары бир болот, бирок айрым мамлекеттер бардыгын өзү тарапка буруп, аны көшөгө артында жүргүзүүгө аракет кылып жатат. Атап айтканда, жакында эле АКШнын өкүлдөрү талибдер менен Катарда жолукту. Андыктан Афганистандагы абалга кайдыгер карабаган аймактагы мамлекеттер Американын пландарынан кабарсыз калууда. Тилекке каршы, мындай ыкма бир гана Афганистанда болуп жаткан жок. Тышкы саясаттагы өзүмчүлдүк, бир тараптуулук Американын администрациясында учурда тышкы саясат менен алектенген ишмерлерге мүнөздүү", — деди министр.

Сергей Лавров Кыргызстанга расмий иш сапары менен келди. Ал өлкө башчысы Сооронбай Жээнбеков менен жолугуп, Кыргыз-орус Славян университетинде студенттерге лекция окуду.