БИШКЕК, 4-фев. — Sputnik. Кыргызстандын бийлиги орус тилинин мейкиндигин көбөйтүүгө кызыкдар. Бул туурасында РФтин тышкы иштер министри Сергей Лавров Кыргыз-Орус Славян университетинде лекция окуп жатканда айтты.
Дипломат мындай жыйынтыкка президент Сооронбай Жээнбеков менен жолуккандан кийин келгендигин айтты.
"Жээнбеков мырза өлкө жетекчилигинин орус тилин улут аралык пикир алышуунун, тагыраагы, расмий тил катары алып жүрүүгө ниеттенгендигин айтты. Сооронбай Шарипович жолугуу учурунда биринчи иретте орус тили Кыргызстан жарандарынын КМШ алкагында ишке орношууга кошумча мүмкүнчүлүк берерин белгиледи. Президент орус тилинин аймагын өнүктүрүү жана бекемдөө зарылдыгын айтты", — деди Лавров.
ТИМ башчысы Сергей Лавров 3-4-февралда Кыргызстанда расмий иш сапар менен болот. Ал президент Сооронбай Жээнбеков жана кесиптеши Чыңгыз Айдарбеков менен жолукту. Андан сырткары, Кыргыз-Орус Славян университетинде лекция окуду.
2003-жылдын 23-октябрында Кыргызстан менен Россия Кант шаарына жакын аймакка ЖККУнун алкагында Тез арада аракетке келүүчү авиациялык бөлүгүн жайгаштыруу боюнча келишимге кол койгон.
