БИШКЕК, 30-янв. — Sputnik. Кыргызстандын хоккей боюнча командасы Дүйнөлүк чемпионаттын квалификациялык оюндарында Босния жана Герцеговина, Гонконг, Кувейт, БАЭ жана Таиланд командалары менен беттешет. Бул тууралуу Sputnik Кыргызстан агенттигине Хоккей федерациясынын вице-президенти Мурат Жакыпов билдирди.
Кыргызстан дүйнөлүк биринчилик үчүн тандоо туруна катышары өткөн жылы май айында белгилүү болгон. Тандоо оюндары 2019-жылдын жаз айларында өтөт.
"Кыргызстан менен бир топто болгон командалар абдан күчтүү. Эгер спортчулар группалык этаптан өтүп кетсе, үчүнчү дивизионго чыгып Дүйнөлүк чемпионатка катыша алат", — деди Жакыпов.
Каржылоо маселеси ачык бойдон калууда. Бирок федерациянын вице-президентинин айтымында, Олимпиадалык оюндар боюнча дирекция маселени чечүү үчүн бардык аракеттерди көрөт.