БИШКЕК, 24-янв. — Sputnik. Жогорку Кеңештин депутаттары транспорт жана жолдор министри кызматына Жанат Бейшеновдун талапкерлигин жактырды.
Маселе парламенттин жалпы жыйынында каралып, аны депутаттарга премьер-министр Мухаммедкалый Абылгазиев тааныштырды.
Мурдагы министр Жамшитбек Калилов орун басары коррупцияга айыпталып кармалгандан кийин отставкага кеткен. Бир айдан бери Жеңишбек Ногойбаев министрдин милдетин убактылуу аткарып жаткан.
Жанат Бейшенов 2006-2007-жылдары аталган министрликте министрдин орун басары болуп иштеген. 2014-жылы премьер-министрдин кеңешчиси, ал эми 2017-жылдан тарта Евразиялык экономикалык кеңештин Транспорт жана инфраструктура департаментинин темир жол бөлүмүнүн жетекчиси болгон.
Бейшенов талапкерлигин колдоп бергени үчүн депутаттарга ыраазычылык билдирип, эл өкүлдөрүнүн берген сунуштарын эске аларын айтты.
