БИШКЕК, 24-янв. — Sputnik. Борбордо жаңы жол чырактарды орнотуу планы жөнүндө мэриянын транспорт бөлүмүнүн жетекчиси Кубан Жусупов айтып берди.
Ал бул туурасында Sputnik Кыргызстан маалымат агенттигинин мультимедиалык пресс-борборунда өткөн "Бишкектеги коомдук транспорт ситемасын өзгөртүү" аталышындагы маалымат жыйынында билдирди.
"Биз унаа тыгынын көзөмөлдөй турчу "акылдуу" жол чырактарды жайылтууну көздөп жатабыз. Машиналардын саны көбөйгөндө, жашыл белги узакка күйүп турат", — деп түшүндүрдү Жусупов.
Мындан тышкары, мэрия жолдогу тыгынды азайтуу үчүн велосипедди да жайылтууну пландоодо. Быйыл шаарга 9 чакырым веложол курууну көздөп жатышат.
