БИШКЕК, 17-ноя. — Sputnik. Президент Сооронбай Жээнбеков Тажикстанга барган кыргызстандыктардын 60 күн каттоосуз жүрүүгө мүмкүнчүлүк берген макулдашууну ратификациялады. Бул тууралуу өлкө башчынын маалымат кызматы билдирди.
18 Тогуздун айы 2018, 22:44
Маалыматта келишимге 2018-жылдын 1-февралында кол коюлуп, КР парламенти тарабынан 11-октябрда кабыл алынганы айтылат.
Эми кыргызстандыктар 60 күн бою каттоого турбастан Тажикстандын аймагында жүрө алат. Ушундай эле система Кыргызстанга келген тажикстандыктарга да каралган.
Ал эми бүгүнкү күндө Тажикстанга барган чет элдиктер беш күндүн ичинде укук коргоо органдарында каттоодон өтүшү керек.
Маалыматта документ расмий жарыяланган күндөн тартып он күн өткөндөн кийин күчүнө кирери айтылат.
