БИШКЕК, 15-ноя. — Sputnik. Казакстанда Дары-дармектерди экспертизадан өткөрүү борбору “вазар”, “вазар-Н” жана “нортиван” аттуу препараттарды сатыкка чыгарууга тыюу салды.
Бул дарылар артериялык кан басымы жогору адамдар инфаркт же инсульт албашы үчүн берилип келген. Алардын бардыгынын курамында валсартан (Кытайдын “Чжэцзян Хуахай Фармасьютикал Ко. Лтд” компаниясы тарабынан чыгарылат), ал эми валсартандын курамында нитрозодиметиламин (NDMA) бар. Казакстандык эксперттердин айтымында, бул дарыларды күн сайын көп дозада колдонуу ракты чакырат.
Аталган дарыларды чыгарган компаниянын сайтында курамында валсартан бар дары-дармектер Түндүк жана Түштүк Америка, Европа, КМШ жана Индияга экспорттолору жазылган.
“Жаныбарларга жасалган тажрыйба N-нитрозодиметиламин рак чакыруусу мүмкүндүгүн көрсөткөн. Бирок адамга да ошондой таасир берери далилденген жок, себеби масштабдык деңгээлде изилдөө жүргүзүлгөн эмес”, — деп сайттагы маалыматта айтылат.
Кыргызстандын рыногуна рак чакыруучу дары-дармек киргенби?
Кыргызстандын Саламаттык сактоо министрлигинин Дары-дармектердин сапатын көзөмөлдөө башкармалыгынын начальниги Чынара Мамбеталиева Бишкекте дагы кытай фирмасы чыгарган курамында валсартан бар дарылар сатылганын, бирок Казакстан чектөө киргизгенге чейин эле сатыктан алынганын билдирди.
“Бул дарылардын курамында ден соолукка кооптуу заттар бар экенин Европанын медицинанын көзөмөлдөөчү агенттиги жар салган. Эл аралык адистер дагы коңгуроо кага баштаган. Бирок курамында валсартан бар дарылар ракты чакырат деген маалымат 100 пайызга тастыкталган эмес. Тажрыйба кемирүүчү жаныбарларга жүргүзүлгөн”, — деди ал.
Sputnik Кыргызстан агенттигинин кабарчысы борбор калаадагы ири дарыканаларга телефон чалып чыкты, алардын көбүндө курамында валсартан бар дарылар бар экени белгилүү болду.
Бирок Мамбеталиева белгилегендей, эксперттер кытай компаниясынын гана препараттарын текшерген.
“Бүгүнкү күндө дарыканаларда курамында валсартан бар "вазар", "нортиван" жана "вазар-Н" аттуу препараттар сатылат. Бирок алар Словенияда чыгарылат. Алардын продукциясына эксперттердин кыпындай суроосу жок. Бул дарыларды коркпостон эле иче берсе болот”, — деди башкармалыктын начальниги.
Ал ошондой эле Саламаттык сактоо министрлигинин бардык аракеттерине карабастан, рыноктон тыюу салынган препараттардын баарын алып салуу мүмкүн эместигин белгиледи. Буга байланыштуу дарыларды расмий дарыканалардан алуу сунушталат.
