БИШКЕК, 23-окт. — Sputnik. Википедия ачык энциклопедиясында Кыргызстандын президенти менен премьер-министри туура эмес жазылганын окурмандар Sputnik Кыргызстан агенттигине билдирди.
Ага ылайык, Википедия ачык энциклопедиясында Кыргызстан тууралуу орусча жазылган маалыматтын ичинде өлкө президенти катары Михрибан Шамаксутова аттуу жаран көрсөтүлгөн. Ал эми кабардын кыргызча бөлүгүндө премьер-министр Осмонов аттуу киши белгиленген.
Түзүлгөн кырдаал боюнча кыргыз википедиячыларынын жетекчиси Чоробек Сааданбеков Sputnik Кыргызстан агенттигине пикирин билдирип, мындай тентектик биринчи эле жолу болуп жатпаганына токтолду.
"Буга чейин да ушундай окуялар болгон. Мисалы Курманжан датка тууралуу маалыматка сөгүнгөн сөздөрдү кошуп салышкан. Википедия — ачык энциклопедия. Ал жерге бардык киши кирип, маалымат кошуп, оңдой алат. Андыктан ага бир гана киши жоопкер деген туура эмес. Эгер бир катаны көрүп салсаңыз Facebook баракчага жазбастан википедияга кирип, оңдоп койсоңуз болот", — деди Сааданбеков.
Ал ошондой эле учурда Википедиянын кыргызча бөлүмүндө 80 миңден ашык материал бар экенин кошумчалады. Андан сырткары, Википедиядагы кыргызча маалыматтардын сапатын арттыруу ар бир жарандын колунда экенин белгиледи.
Учурда ката жазылган билдирүүлөр оңдолду.
