БИШКЕК, 8-окт. — Sputnik. football-rankings.info сайты Кыргызстандын футбол боюнча курама командасы беттешүүлөр болбогондугу үчүн октябрь айында FIFA рейтингинде төмөн түшүп кетиши мүмкүн экенин божомолдоду.
Эске салсак, команда ушул жылдын апрель айында 75-позицияга илинип, рекорд жасаган.
Сайттын буга чейин дагы так анализдерди жасаган адистеринин пикиринде, кыргыз командасы октябрдын рейтингинде бир тепкичке ылдыйлап, 92-орунда болуп калышы ыктымал. Рейтинг 25-октябрда жарыяланмакчы.
Кыргызстандын футболчулары акыркы жолу беттешке сентябрь айынын рейтингине чейин чыккан. Келерки мелдеш япониялык атаандаштар менен 20-ноябрь күнү болмокчу.
