БИШКЕК, 24-сен. — Sputnik. Эмгек жана социалдык өнүгүү министринин мурдагы орун басары Зууракан Каденова Сеулда болгон окуя учурунда мас болуп, өзүн ачуулуу алып жүргөнүн Кыргызстандын Түштүк Кореядагы элчиси Кылычбек Султан маалымат жыйында билдирди.
Анын айтымында, Каденова чындап эле мас болгонун авиакомпаниянын өкүлдөрү тарабынан кол коюлган расмий барактар тастыктап турат.
"Ал ичип алып, өзүн ачуулуу алып жүргөн, бирок жаңжал салган эмес. Ал учактын ичине кусуп салгандыктан көйнөгү дагы булганган. Канында алкоголдун бардыгын текшерүү боюнча медициналык кароодо өткөн эмес", — деди Кылычбек Султан.
Элчи андан сырткары, жогорку кызматтарда иштегендер бул маалыматты чыгарба деп талап кылышканын кошумчалады. Бирок Султан мындай талапка көнбөй, анан калса Каденова Сеулдун аэропортунда болгон окуяларды бурмалап маалымат таратканы үчүн ал тууралуу ачык айтып чыгууну чечкен.
Кореянын Сеул шаарындагы аэропортто учакта жогорку кызматта иштеген кыргызстандык аткаминер аялдын кылыгы тууралуу ЖК депутаты Аида Исмаилова Facebook баракчасына жазган.
Кийин маалым болгондой Сеул — Алматы каттамы КР эмгек, социалдык өнүгүү министринин орун басары Зууракан Каденованын айынан эки сааттай кармалган. Премьер Мухаммедкалый Абылгазиев министрдин орун басарын кызматтан алуу боюнча буйрук чыгарган.
Ал эми Зууракан Каденова Sputnik Кыргызстан агенттигине арак ичпегенин, учак учар алдында жүрөгү ооруп корвалол дарысын ичкенин айтып, учактын ичинде өзүн жаман сезгенин билдирген.
