БИШКЕК, 21-сен. — Sputnik. Россиянын "Вега" радиокуруу концерны "Коопсуз шаар" долбоору боюнча өткөн аукциондун жеңүүчүсү деп табылганын Маалымат технологиялары жана байланыш мамлекеттик агенттиги билдирди.
4-сентябрда "Коопсуз шаар" долбоору боюнча аукцион өтүп, ага "Вега", "Альфа телеком" жана "Маалыматтык системанын коопсуздугу" компаниялары катышкан.
Тендердин баштапкы баасы 2,5 миллиард сом. Аукцион бул сумманы төмөндөтүш үчүн өткөрүлүп, ал эки лотко бөлүнгөн. Ар биринин баштапкы баасы 1 миллиард 276 миллион 353 миң 120 сом. Аукциондун натыйжасында эң аз сумма сунуштаган "Концерн радиостроения "Вега" компаниясы жеңишке жетти. Ал биринчи лотко 1 миллиард 125 миллион 765 сом, экинчисине 1 миллиард 195 миллион 575 сом сунуштаган.
Конкурстун жыйынтыгы мамлекеттик сатып алуулар порталына жарыяланды.
Буга чейин 23-августта өткөн аукциондун жыйынтыгында мамлекеттик сатып алуулар системасы бузулуп калып, жеңүүчү аныкталган эмес. Андыктан аукцион болбой калган. Конкурстун шарты боюнча эң төмөнкү бааны сунуштаган тарап жеңүүчү деп табылат.
