Дарыгерлерге санавиациялык кызмат көрсөткөндүгү үчүн акы төлөнбөйт. Бул тууралу Нарынбек Акматов Sputnik Кыргызстан радиосунун таңкы эфиринде маек куруп жатып билдирди.
Анын айтымында, зарыл учурда аймактарга барып операция жасап же көмөк көрсөткөндүгү үчүн дарыгерлерге 2012-жылга чейин кошумча акча төлөнүп берилчү.
"Биздин бөлүм элге "санавиация" деген ат менен белгилүү. Мурда карамагыбызда тик учак, учактар болгон. Алар жарактан чыккан соң, учурда заманбап автоунаалар менен каттайбыз. Биздин милдет алыскы аймактарда тиешелүү дарыгерлер жок болуп калган кезде, бейтаптын абалы оорлоп борборго келе албаса, же күтүлбөгөн кырсыктан улам зарыл операция жасоо талап кылынса барып, жеринде иштейбиз. 2012-жылга чейин дарыгерлерге бул кызматы үчүн кадимки айлык акысындай эле каражат төлөнчү. Учурда ал акчаны кыскартып салышкан. Башкача айтканда, дарыгер канчалаган саат жол жүрүп, оор операцияны жасап келгени үчүн эч кандай акы албайт", — деди Акматов.
Ал учурда бул боюнча саламаттыкты сактоо министрлигинде маселе көтөрүлүп жаткандыгын кошумчалады.
