БИШКЕК, 20-сен. — Sputnik. Баткен мамлекеттик университетинин (БатМУ) мурдагы жети кызматкери студенттерине мыйзамсыз түрдө диплом берген деп шарттуу түрдө кесилди. Бул туурасында Улуттук коопсуздук мамлекеттик комитетинин маалымат кызматы кабарлады.
Билдирмеге караганда, мындай иштерди 2017-жылы университеттин мурдагы ректору Г.М. өзүнүн А. П., Г. Б., Р. Ж., Н. Х., М. Б., М. М., М. М. аттуу кызматкерлери, Кызыл-Кыя колледжинин директору Т. О. жана Оштогу "Сулайман-Тоо" музей комплексинин жетекчиси Э. М. менен биргеликте жасаган. Алар жасалмаланган академиялык маалымат каттын негизинде 56 студентти башка ЖОЖдо окуду деген жүйө менен БатМУнун бүтүрүү курсуна кабыл алган.
"А. П, М. Б., Т. О., Н. Х., М. М., М. М. жана Р. Ж. атуу жарандарды Баткен райондук соту күнөөлүү деп таап, бештен жети жылга чейин шарттуу түрдө эркинен ажыратты. Ал эми Г. М., Г. Б жана Э. М. кылмыштын мөөнөтү өтүп кеткендигине байланыштуу сот өндүрүшүн кароо токтотулду. Натыйжада сот 39 студенттин дипломун жараксыз деп табуу өкүмүн чыгарды", — деп айтылат маалыматта.
Ошондой эле УКМК мындан ары да билим берүү тармагындагы коррупциялык схемаларды аныктоо иштери улантыларын эскертет.
