БИШКЕК, 5-сен. — Sputnik. Жергиликтүү телеканалдардын бирине Кыргызстандын Гимнин туура эмес ырдаганы үчүн Жогорку Кеңештин депутаты Пархат Тулендыбаев расмий кечирим сурады. Бул тууралуу Жогорку Кеңештин маалымат кызматынын башчысы Ибраим Нуракун уулу билдирди.
"Гимн — кыргыз элибиздин башкы мамлекеттик символдорунун бири. Анда биздин байыркы тарыхыбыз, эркиндикке болгон мүдөөбүз жана жаркын келечекке карай умтулуубуз туюнтулган. Гимнди эгемен өлкөбүздүн ар бир атуулу билүүгө милдеттүү. Журналисттердин суроолоруна жооп берип жатып, Гимнибизди жаңылыш аткарып алганым үчүн кыргыз элимден башымды ийип кечирим сурайм жана абдан өкүнгөнүмдү билдирем. Ошондой эле Гимнибизди мындан ары кынтыксыз аткарууга милдеттеме алам", — деп айтылган билдирүүдө.
Эске сала кетсек, 4-сентябрда Жогорку Кеңеш ишин баштаган. Анда телеканалдардын биринин кабарчылары депутаттарга "Кыргызстандын Гимнин ырдап бара аласызбы?" деп кайрылышкан.
Депутаттар — Аида Касымалиева, Пархат Тулендыбаев, Музаффар Исаков, Жанар Акаев, Исхак, Пирматов, Төрөбай Зулпукаров, Чыныбай Турсунбеков гимнден үзүндү ырдап беришкен. Бирок Жанар Акаев айрым куплетти билбей калганы үчүн кечирим сурап, Facebook баракчасына жазган.
Ал эми Исхак Масалиев, Бактыбек Сыдыков, Бакирдин Субанбеков, Искендер Матраимов, Улукбек Ормонов аткаруудан баш тартышкан.
