Оозуна сайылган айры мээсинен чыгып калыптыр. Бул тууралуу Акылбек Акматалиев Sputnik Кыргызстан радиосунун таңкы эфиринде маек куруп жатып билдирди.
Анын айтымында, аталган бөлүмдө мээге күнүнө үч-төрт операция жасалат.
"Бизге мээ шигиги, мээ кан тамыр оорулары жана андан сырткары түрдүү кырсыкка кабылып, келгендер бар. Мисалы чөп жүктөп жатып машинадан кулап кеткен киши келген. Ал жерге жыгылганда чалкасынан түшкөн экен, артынан кулаган айры кыйкырып жатканда оозуна сайылып калган. Мээни тешип өтүп, сыртка чыгып калган айрыны, жанындагылар кишинин чекесин тебелеп туруп сууруп алышкан. Жергиликтүү ооруканага барып, эч жери оорубаганын айтып, кетип калган. Бир топ убакыттан кийин башы ооруп бизге кайрылган. Биздин дарыгерлер топтолуп калган ириңди алып, операция жасап беришен. Организм өзү да оору менен дайыма күрөшөт. Сөз болуп жаткан бейтаптын организми да мээге топтолгон ириңди башка жакка өткөрбөй, тосуп койгон", — деди Акматалиев.
Ал нерв ооруларынын алдын алуу үчүн спорт менен машыгып туруу зарыл экенин кошумчалады.
