Интернеттен көрүп дары сатып албагыла. Ошондой эле биологиялык активдүү кошулмаларды дарыгердин көзөмөлүсүз ичүү да организмге зыян. Бул тууралуу Мыскал Емилова Sputnik Кыргызстан радиосунун таңкы эфиринде маек куруп жатып билдирди.
Анын айтымында, учурда түрдүү жарнамалардан көрүп, туура келбеген дарыларды ичкендер көбөйдү.
"Азыр интернеттен көрүп эле өз алдынча сатып алып колдонуп же жарнамалардан көргөн дарыларын ичкен бейтаптар арбыды. Алар дарыгер менен кеңешпегендиктен көпчүлүк учурда дарыланам деп тескерисинче ден соолугу зыян тартатт. Өтүшүп кеткен учурда гана бизге кайрылышат. Биз дарыгерлер 6-7 жыл билим алып, канчалаган жылдар иштеп жүрүп да бейтапка дары берээрде коркобуз. Анын өлчөмүн, курамын, адамдын ден соолугундагы өзгөчөлүктөрүн билиш керек да. Билбей туруп дары колдонуу өлүмгө чейин алып келген учурлар бар", — деди Емилова.
Ал түрдүү чөптөр менен дарылап жиберем деген элдик табыптардан да оолак болууга чакырды.
