Кыргыз шырдагы өлкөнүн бардык аймагында, өз өзгөчөлүктөрү менен жасалат. Мисалы Жалал-Абадда кылымдан келе жаткан бир ыкма бар. Мындай пикирин Динара Чочунбаева Sputnik Кыргызстан радиосунун таңкы эфиринде маек куруп жатып билдирди.
Анын айтымында, бир мамлекеттин ичинде кол өнөрчүлүктүн ар түрдүү болушу улутта ажырым жаратат деген пикир туура эмес, тескерисинче ошол өлкөнүн тарыхынын бай экендигинен кабар берет.
"Кыргыздар өз байлыгыбызды барктабайбыз. Мисалы Жалал-Абадда кылымдан бери жасалып келе жаткан ыскыч шырдагын түндүк тараптагылар билбейт. Бул да нукура кыргыздын шырдагы. Жасоо техникасы, оюуларында айырмачылык болгону менен ата-бабалардан бери жергиликтүү калк сактап келе жаткан, кыргыздын дагы бир сыймыгы десек болот. Мындан сырткары, ошол эле элечекти алсак, ар өрөөндө ар башкача жасашкан. Таластын элечегин мактануу менен дүйнө элине көрсөтсөк болот. Айтор, биздин кол өнөрчүлүккө улуттун тарыхы, маданияты, эконмикасы, тарбиясы — баары камтылган", — деди Чочунбаева.
Ал кыргыз кол өнөрчүлөрүнө мамлекеттик деңгээлде көңүл буруу зарылдыгын кошумчалады.
